Ayuntamiento de Tolosa

Tolosak ospatu berria du bere 750. urteurrena. Antolatu ditugun ekitaldien bidez aukera izan dugu gure iragana hobeto ezagutzeko eta, horrela, etorkizun hobe baten zerbitzura jartzeko. Tolosa merkataritza gune modura sortu zen eta bere historian zehar nekazaritza eta abeltzaintzaren esparruan garatu da. Horretaz gainera, jakin izan du industriari lekua egiten eta hura garatzen, zerbitzuen sektorearekin egin duen bezalaxe. Beraz, Tolosak jarduera ekonomikoaren sektore guztiak ezagutu ditu eta, orain, sektore horiek guztiak bere lekua izango duten etorkizuna prestatzen ari da. Izan ere, gizarte modernoan lehen sektorea, industria eta zerbitzuak beharrezkoak dira, garapen eta enplegu aukerak sortzeko.

Etorkizun hori Tolosa 2015 proiektu estrategikoan artikulatzen da. Hain zuzen, proiektu honen helburua da Tolosako herriaren etorkizuna definitzea partaidetza aktiboaren bitartez. Ekimen horrek, elkarrizketa eta partaidetzaren bidetik, helmuga gisara ildo estrategiko batzuk bultzatzea ezarri du; hain justu, bizitza kalitate handiagoa eta aurrerapen zein garapen aukera handiagoak eskainiko dituzten ildo estrategikoak. Dudarik gabe Internet da XXI. mendeko partaidetza tresna garrantzitsuenetakoa, eta arrazoi horrengatik, Udalaren web orri hau denen partaidetzarako gonbidapen bat da batez ere. Teknologia berriek aukera ematen digute gure eskeak, ideiak eta iradokizunak zuzenean eta bitartekorik gabe adierazteko. Hemen daukagu, hortaz, aurreneko aukera parte hartzeko. Nire gonbitea duzue, beraz, parte hartzeko Tolosarentzat ahalik eta etorkizunik onena prestatzeko. Denok dugu zeresana.

Horretarako, jakin badakigu denen laguntza beharrezkoa dugula. Aurrena tolosarrak. Zuen eskura duzue baliabide bat, dauzkazuen beharrak eta proposamenak aurkezteko. Era berean, gizarte antolatua: gizarte taldeak eta gainerako elkarteak, kulturalak, kiroletakoak, etab. Izan ere, betidanik bizitasun handia eta Tolosarekin konpromiso sakona erakutsi izan dute. Eta alderdi politikoak eta erakundeak. Beren helburu komuna etorkizun hobeago bat baita. Eta hau guztia zertarako? Errealitate bihurtzeko gure konpromiso hau: etorkizuna denon artean eraikitzea. Tolosak oso une garrantzitsua bizi du bere etorkizunari dagokionez eta denon guztion babesa eta laguntza behar ditu. Adostasuna eta akordioa izango dira gure lehenbiziko helburuak. Lehenik eta behin, herriak horixe eskatzen duelako, eta, bestalde, ikusita dagoelako hori dela biderik praktikoena eta eraginkorrena aurrera egiteko. Eta hauxe da Tolosaren premiarik handiena: aurrera egitea. Une hau aprobetxatzea, oinarri sendo bat jartzeko etorkizuneko garapen eta aurrerapen kolektiboari.

Hau da Tolosa 2015 ekimenaren helburua: diseinatzea etorkizun partekatu eta aurrerapenezkoa. Aukera berriak emango dituen etorkizuna, bereziki gazteei -gure lehentasun osoa baitute belaunaldi berriek-. Eta, noski, aukerak arlo guztietan: prestakuntza, aisialdi aktiboa, asoziazionismoa, elkartasuna, etxebizitza eta enplegua. Tolosak etorkizunik izango du baldin eta gure gazteriak arlo horietan guztietan aukerak badituzte. Eta horretarako bidea erraztea eta egitea gure ardurak dira.

Tolosak alor horretan berritzailea izan nahi du. Horregatik jarri dugu martxan herri partaidetzako proiektu pilotu hau, teknologia berrien erabilera tartean sartuta. Biziberritu egin nahi ditugu gizarte eta ekonomia jarduerak partaidetzaren bidetik. Tolosa 2015, orain eta batez ere, etorkizun hobe baten aldeko apustu handi honetan parte hartzeko gonbitea da. Eta apustua hemen eta oraintxe hasi da. Web orri honetan hasi da, parte hartzeari ireki zaion ate honetan, hain zuzen. Atea, batez ere gazteentzat. Horiengana jo nahi dugu bereziki, konpromisoa har dezaten beren iritzi eta eskeekin. Hauxe da unea proposamenak egiteko, eskatzeko, kritikatzeko eta bide nahiz aukera berriak iradokitzeko. Sartu eta parte har ezazu zuzenean Tolosa 2015 ekimenean. Zure laguntza behar dugu zuretzat eta denontzat etorkizun hobea diseinatu eta eraikitzeko.